Ta esta pa confundido el maga otoridad si cosa gayot el motive del maga persona quien ya gueria granada adentro del Mosque na Talon-Talon enantes madrogada donde ya resulta na muerte del dos maga Religioso Islam y tres otro ya sale irido.
Ta continua pa pipina evidencia y informacion el maga pulis para puede saca con el maga persona responsable na explosion.
Serca man ala una del madrogada enantes cuando ta dorme el 11 maga Tablig o maga Religioso Islam adentro del Mosque de Maharlika cuando ya rebenta adentro el un PRB 423 granada.
Ya muri amo canda Hji. Sattal M. Bato, 47, casao de Isabela City y si Rex Z. Habil, 46, casao de Lamitan City.
Mientras irido canda Palson Saji Asgali, 44, casao, Alnizkar A. Sabbaha, 30, casao y si Jikilan J. Albani, 60, casao todo de Lamitan City.
Asegun ya llega aqui na ciudad el maga Tablig para hace calayat el mensahe del religion y ya esta estos na Mosque na Talon-Talon.
Maga pulis ya encontra el safety lever del granada y pedaso de sticker donde ta dale mira que PRB amo el clase de granada que ya hace rebenta.
