EXTORTION | 26-anyos nga estudyante, dakop sa entrapment operation sang CIDG; 21-anyos nga biktima, ginapahug sang suspek ipalapta sini ang hublas nga laragway sang babaye

100

President Roxas, Capiz – Nakahunong na sa karsel sang Criminal Investigation and Detection Group (CIDG) Capiz ang 26-anyos nga estudyante matapos ginreklamo sang pagpang-extort sa isa ka babaye. Nadakpan sang mga otoridad ang suspek nga ginkilala kay Fermart Fuentes, residente sang Barangay Poblacion, President Roxas, Capiz pinaagi sa isa ka entrapment operation kagab-i, sa nasambit man nga lugar.
Suno sa pahayag sang tagreklamo nga isa ka call center agent nga gintago lamang sa pangalan nga si alyas Jacky 21 anyos, nga nakibot ini sang makabaton sang mensahe sa iya nga facebook account nagikan sa FB user nga “Ako lang sapat na”. Nakasaad sa amo nga mensahe nga may gina-uyatan nga hublas nga laragway kag video sang tagreklamo. Magluwas diri, nagpadala man sang laragway sang iya nagatig-a nga kinatawo ang suspek kag nagpahayag nga ginatamdan sini ang mga hublas nga laragway ni alyas Jacky. Nagpangayo man sang P7,000 nga cash si Fuentes sa kondisyon nga indi sini pagpalapta ang picture kag video sang babaye.
Makapila ini ka beses nga ginbaliwala sang dalaga ang ginahimo sang suspek bangud wala man ini sang matandaan nga may nagkuha ukon nag take picture nga nakahublas ini. Bangud sini nagpangayo na sang bulig sa mga katapo sang CIDG si alyas Jacky kag ginkasa ang entrapment operation. Nagtabuay ang suspek kag ang tagreklamo sa madulom nga bahin sang Barangay Poblacion, kag ginhatag na ni alyas Jacky ang sobre nga may unod nga kwarta sa suspek nga nakatabon sang panapton ang iya nawong agud indi makilala sang tagreklamo.
Lipod sa ihibalo sang suspek, nakaplastar na ang mga katapo sang CIDG sa lugar kag gindakop ini. Nahibalun nga kasimaryo man lang gali sang tagreklamo ang nasambit nga suspek. Gintu-ad sang suspek nga nabuhat lamang sini nga mag-extort sang kwarta sa babaye bangud may mga balayran ini sa eskwelahan. Indi man matuod suno diri nga may gina-uyatan ini nga hublas nga laragway ukon video ni alyas Jacky. Magapangatubang sang kaso nga Robbery Extortion si Fuentes.

www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments