“Extortion” ang gitumbok nga nag-unang motibo sa pagsunog sa tulo ka mga heavy equipments didto sa Purok 1, Brgy. Libertad, Prosperidad, Agusan del Sur bandang alas 12:30 ang takna sa kaadlawon.
Saysay sa mga nakasaksi nga mokabat sa 10 ka mga armadong lalaki kinsa nagpaila nga mga sakop sa rebelding New Peoples’ Army (NPA) ang kalit mibotho sa lugar ug walay langan nga gidab-daban ang duha ka unit nga dumptrucks ug usa ka unit nga Isuzu flatbed hauler.
Gipanag-iyahan ang usa ka dumptruk ug usa ka hauler sa negosyante nga si Jose Necresio Orapa, 50 anyos ug residenti sa Purok 1, Brgy. Libertad, Prosperidad, Agusan del Sur samtang iya usab ni Engr. Jun Cadiz taga Purok 23, San Francisco, Agusan del Sur ang usa ka Hyundai dumptruck. Gisuwayan pa unta sa mga sibilyan ang pagpalong sa kalayo apan gibadlong sila sa mga armado.
Gibutyag ni P/Maj. Renel Serrano nga bisan ug nagkahinay na ang pwersa sa NPA Guerilla Front Committee 19 apan nakahimu gihapon sila sa pagsunog human nakabaton ug dyutay’ng kusug gamit pipila ka adlaw nga gipatumang unilateral ceasefire sa goberno (with report archer capadeso/ivy falcone). [image: sunog ekipo.jpg]
