Davao City – Giklaro sa City Government of Davao nga adunay kagawasan ang mga establisyemento nga magpatuman og “No face shield, no entry” policy ug kini angay nga tumanon ug respetuhon sa publiko.
Sa Section 3 sa gipagulang updated Executive Order (EO) No. 51-B Series of 2021 sa lokal nga gobyerno, mamahimong makapatuman og mandatory nga pagsuot og face shield ang mga ospital, opisina, ug uban pang establisyemento isip ilang kaugalingong palisiya.
“Section 3. MANDATORY USE. Offices, hospitals, and all other establishments may require the mandatory use of face shields within their properties. In these cases, employees, clients, and guests must follow the company rule,” nakalatid sa EO.
Una nang gipahibalo nga boluntaryo na lamang ang pagsul-ob og face shield sa crowded places, close contact setting, ug confined and enclosed spaces (3Cs) setting dinhi sa syudad sa Davao.
Matud ni Dr. Michelle Schlosser, Spokesperson sa Davao City COVID-19 Task Force (sa interbyu sa city-owned radio) nga nakadepende sa pagsunod sa katawhan sa minimum public health standards batok Coronavirus Disease 2019 (COVID-19) ang pag-ubos sa kaso o bisan ang pagbaton og surge sa COVID-19 cases.
“Kung gusto nato nga magpabilin ‘ta sa level 3 or mubaba pa ‘ta sa level 2 para mas mag-ease ang restrictions, ang question karon is magpabilin sa katawhan, kung desiplinado ba ‘ta,” matud ni Schlosser.
Pipila sa mga gipaluagang restrictions sa Local Government Unit (LGU)-Davao mao ang pagwagtang sa curfew, pag-modify sa liquor ban, pagwagtang sa motorcycle ug Public Utility Vehicle (PUV) barrier, ug paghimong voluntary sa face shield sa 3Cs setting.
RadyoMaN Kirby Manzon
