General Santos City—dead on arrival sa Gensan City Medical Center ang usa ka Elie Boy Dela Torre Sambilad human kining gidunggab sa wala pa mailhing suspek samtang kini nag inum sulod sa usa ka video-k bar sa may Barangay Calumpang, Gensan alas 10:45 ang takna sa gabie.
Subay sa inisyal nga imbistigasyon sa kapulisan nasuta nga naglingaw-lingaw ang biktima uban sa iyang mga amigo sulod sa usa ka bar dihang kalit lang matud pa kining giduol sa usa ka suspek nga naglingkod sa pikas nga lamesa.
Gideretso ug duslak sa suspek ang dala niining hait nga hinganiban ngadto sa biktima. pila ka gutlo lang ang nakalabay niduol sab ang duha pa ka kaubanan sa suspek dayon gidunggab sab pila ka higayon ang biktima hinungdan nga nakaangkon kini ug daghang mga samad sa lawas.
Wala nakaporma ang mga kaubanan sa biktima tungod parehong may mga hinganiban ang mga suspek. human sa pagpanunggab, paspas nga misibat ang suspek sa wala pa masayring lugar samtang ang biktima gidala sa pinakaduol nga balay tambalanan apan gideklara kining dead on arrival.
