General Santos City–Wala makalingkawas sa kamatayon ang trabahante sa canning factory nga si Abdul Addul, 30 anyos samtang nagpabilin pa sa ospital ang kauban niining si Halid Mocles habal-habal drayber nga susamang mga residente sa Purok Mocles, BarangayTambler.
Nasayran nga una ng gipamusil ang mga nahisgutan sa wala pa mailhang mga responsible niadtong nakalabayng gabii sa Purok Banisil sa naasoy nga barangay samtang nakasakay og motorsiklo ang mga biktima. Sumala ni alyas Betty, residente sa lugar hain nahitabo ang pagpamusil, daan na nga nag-atang ang mga suspek sa maong lugar. Pag-minor sa mga biktima didto na nakahigayon ang suspek sa pagpusil kanila.
Dugang pamahayag ni Betty nga nakit-an gyud niya ang panghitabo kung asa unang gipusil ang angkas nga si Abdul ayha gisunod pagpusil ang drayber nga si Mocles. Human ang pagpamusil nakahimo pa sa pagpadagan sa motorsiklo ang mga biktima apan sa unahan nga bahin natumba kini.Naningkamot pa nga makapalayo sa lugar ang mga biktima apan gilayong nahagba sa dalan si Abdul.
Didto na usab nabugtuan sa iyang kinabuhi ang biktimang si Abdul samtang gilayon nga nadala sa ospital ang biktimang si Mocles nga nakaangkon og samad pinusilan sa iyang kilid. Human ang pagpamusil wala na gigukod sa mga suspek ang mga biktima nga nangayo og tabang sa mga tawo inay paspas silang misibat palayo sa maong lugar.
Giangkon ni Betty nga bisan iyang nasaksihan ang panghitabo, wala niini mamay-ungi ang dagway sa mga suspek nga gikaingong didto migawas sa purok Greenmedos sa maong Barangay. Sa pakighinabi sa Rmn News Team kay Police Major Richard Ibanez, Hepe sa Tambler PNP, giangkon niini nga aduna na silay mga testigong gihuptan sa maong panghitabo. Dili pa tin-aw alang sa kapulisan ang motibo sa krimen apan pipila sa ilang ginatutukan ang rido og personal nga bangi. Padayon pa usab ang imbestigasyon sa kapulisan sa Tambler sa maong panghitabo.(JB)
