Davao City – Importante kaayo nga adunay interaksyon ang matag miyembro sa pamilya ilabi na diha sa lamesa.
Gibutyag ni City Social Services and Development Office (CSSDO) Head Malou Bermudo, gikinahanglang maggahin gayud og igong panahon para mag-istorya ang mga ginikanan ug ilang mga anak.
Tambag ni Bermudo nga aron adunay quality time ang matag miyembro sa pamilya, gikinahanglang ipadaplin usa ang mga gadgets ilabi na kung ting-kaon sama kaniadtong karaang panahon nga dili pa nauso ang gadgets.
“Gina-engganyo gyod nato ang mga ginikanan nga naa gyod ‘tong higayon nga magkauban mo sa mga bata sa pagkaon kon dili man sa panihapon o paniudto, naa ‘tay ‘Family Day’ aron mahibaw-an nato unsa nay nahitabo sa atong mga kabataan. Importante ang adlaw-adlaw nga pag-diyalogo, ang komunikasyon is really, really important,” dugang ni Bermudo.
Tambag ni Bermudo ngadto sa tanang mga ginikanan nga pirmanentehon ang pagkumusta sa ilang mga anak aron ilang mahibaw-an ang mga katikaran sa ilang kinabuhi ug aron mapalig-on pa’g maayo ang tagsa-tagsa nila ka mga relasyon sulod diha sa panimalay.
RadyoMaN Aimee Guinita
