Davao City- Problema sa linya sa kuryente ang gidudahang rason sa pagkaugdaw sa usa ka balay sa Prk. 4, Vicenta Gloria Village Tibungco ning syudad sa Davao karong alas 5:10 sa hapon adlawng Huwebes.
Paspas nga nikuyanap ang kalayo hinungdan nga nadamay usab ang tapad niini nga usa ka balay.
Gibutyag ni Panacan Fire station investigator FO3 Rocky Palmera nga nagsugod ang sunog sulod sa kwarto ni Rosalinda Jamago.
“Nasayran nato nga 24 years na ang ilang wiring wala nay ilis-ilis, so posible sa kadugayon sa ilang wiring nibigay na gyod siya,” sumala ni Palmera.
Matud kang Palmera kapin kun kulang P100,000 ang estimated nga damyos sa maong sunog.
Bandang alas 5:43 na kontrola sa mga kabomberohan ang sunog ug gideklarang fire-out alas 5:53 sa hapon.
Samtang ang tag-iya nga si Jamago naabtan pa sa DXDC Team nga nitayabaw og hilak human gilamoy sa kalayo ang ilang panimalay diin walay nasalbar ang pamilya sa biktima ug tanang mga appliances niini na-abo og apil.
Sumala ni Barangay Tibungco Kagawad Marievie Apaitan nga lima ka pamilya ang apektado sa maong sunog ug matud niini nga temporaryo nilang ihikling ang mga nasunugan sa Doña Vicenta Multipurpose Center ug itunol usab sa barangay ang mga tabang para sa mga biktima.
RadyoMaN Aimee Guinita
