Davao City – Sa pinakaulahing gipagula nga public health warning sa Food and Drug Administration (FDA), gipasidan-an karon ang publiko batok sa pagpalit ug pagpamaligya sa usa ka brand sa beauty products nga makita sa mga establisimyento nga makadaut sa panglawas.
Sa interbyu sa DXDC RMN Davao kang FDA Region-XI Director II Deborah Legaspi, gipahimangnuan niini ang mga konsumante sa adulterated cosmetic product nga ‘The Original Porcelana Astringent Improved Formula’ nga nagpositibo sa hydroquinone ug tretinoin.
Matud ni Legaspi, ang presensya sa nasangpit nga mga kemikal dili pwedi sa cosmetic products subay kini sa Annex II Part I sa ASEAN Cosmetic Directive.
“Ito ay patungkol sa adulterated cosmetic product na ang kanyang pangalan ay ‘The Original Porcelana,’ pag meron kasing presence na ng hydroquinone at tretinoin, hindi na siya nasa classification ng cosmetic….dapat drug product category na siya,” matud ni Legaspi.
Gisulti ni Legaspi nga ang paggamit sa maong produkto muresulta sa skin irritation, pangatol, anaphylactic shock ug organ failure.
Gimando sa FDA ang pagpaundang sa pagbaligya niini diha sa mga drug stores, department stores, supermarkets ug uban pang establisimyento-komersyal.
Giawhag niini ang publiko nga kung makit-an kini diha sa mga tindahan, mamahimong i-report kini gilayon sa ilang opisina sa 31, 2nd Floor, LCI Building, Quimpo Blvd, Ecoland, Davao City o itawag sa FDA hotline #: 322-62-01.
RadyoMaN Aimee Guinita
