iFM Laoag – Ginasgasut a sako ti organic ken commercial fertilizer ti inbunong ti Department of Agrarian Reform – Ilocos Norte kadagiti agrarian reform beneficiaries (ARB) iti probinsya.
Dagiti naikkan ti sinaksako a fertilizer ket dagiti mannalon a kameng ti Pacifico ARB Multipurpose Cooperative (Marcos), Baldias AR Cooperative (Dingras), Namnama ARB Multipurpose Cooperative (Piddig), Garnaden Multipurpose Cooperative (Nueva Era) ken Catangraran AR Cooperative (Solsona).
Nabunungan pay ti seeds ken insecticide dagiti ARB manipud iti Baldias AR Cooperative, Pacifico ARB MPC, Namnama ARB MPC ken Garnaden MPC.
Inbatad ni Provincial Agrarian Reform Program Officer II Vic M. Ines a ti fertilizer distribution ket naipatungpal babaen ti Convergence on Livelihood Assistance for Agrarian Reform Beneficiaries Project (CLAAP).
Ti CLAAP ket programa a nagbinnuligan ti DAR ken Department of Social Welfare and Development (DSWD) tapno matulungan dagiti ARB a mangparang-ay pay ti panagbiagda.
Kabayatanna, siamapulo ket uppat a burias ti inbunong ti DAR Ilocos Norte kadagiti ARB manipud iti Tribal AR Cooperative (Nueva Era) ken Lucky AR Cooperative (Solsona).
Daytoy a pig dispersal ket paset pay laeng ti programa ti CLAAP nga ipatpatungpal ti DAR Ilocos Norte. [Detalye manipud ken ni Jorge Guerrero]
– Bernard Ver, RMN News
