Napuno sa kalipay ug paghudyaka ang Capitol Gym sulod sa compound sa Kapitolyo sa Sarangani niaging adlaw nga Sabado atol sa culmination program sa Linggo ng Kabataan human niabot ug nidalit sa ilang talento sa pagkanta ang sikat nga Fil-Am kon Filipino-American pop sensation nga Perkins Twins, ang mga batan-ong magkambal nga sila Jesse ug Christian Perkins.
Human sa malampuson nga panagtigum sa mga kabataan sa KCC Convention Center adlaw nga Byernes kauban si Jennifer Bricker, ang inila nga American acrobat nga nihatag og inspirasyon sa mga kabataan pinaagi sa pagpa-ambit sa kalampusan sa iyang kinabuhi taliwala sa iyang kapansanan nga gipanganak kining walay mga tiil, ang Perkins Twins na usab ang nilingaw ug nihatag pagdasig sa mga kabataang Sarangan pagkasunod adlaw nga Sabado.
Kuyog sa Perkins Twins ang ilang mga ginikanan, ang ilang inahan nga usa ka Pinay ug ang ilang amahan nga usa ka Amerikano. Nagdako sila sa California, America apan nagpabilin ang ilang pusong Pilipino hinungdan nga maayo sila mag-Tagalog, rason usab nga ang ilang mga original composition sa kanta ang halos mga OPM. Gidala sila sa Sarangani Province sa international NGO nga dugay ng partner sa opisina ni Governor Steve Chiongbian Solon nakatutok sa kaayuhan sa mga bata nga mao ang World Vision.
Segun nila Jesse ug Christian Perkins, first time nilang niabot sa Sarangani ug kung sila ang pabut-on ang gusto na nilang magpabilin. Nakita nila nga “peaceful” and “relaxing” ang probinsya. Sa airport pa lang, gisugat na matud pa silag banda sa mga Sarangani youth leader. Malipayon silang nakig-uban sa mga kabataan tungod kay dugay na matud pa silang partner sa Department of Education sa pagpakaylap sa abokasiya nga “no to drugs, no to smoking, no to alcohol and no to bullying” sulod sa mga ekswelahan.
Gani, sunod bulan, nakatakda ang ilang pagbalik sa Sarangani Province aron daghan pang estudyante ang makakita ug madasig sa ilang mga ginabuhat. Upat (4) katuig na matud pa silang nagkauban sa World Vision. Ginagamit nila ang musika aron daghan pa ang matagaag inspirasyon ang padayong pagpakabuhi niining kalibutan nga ligdong ug nahasubay sa kabubut-on sa Kahitas-an. Gimatuto matud pa sila sa ilang Pilipina nga inahan nga magpabilin nga may maayong relasyon sa isig-katao.
Wala usab nila kapugngi nga mudayig sa pagdumala ni Governor Solon. Nakita nila nga anaa ang kasingkasing sa Gobernador sa pagtabang sa mga katawhan, ug ang kinaiya matud pa nga mapa-inubsanon.
Sa maong culmination program sa Linggo ng Kabataan sa Sarangani Province, nagkahigayon pud nga adunay open forum gimugna si Governor Solon ngadto sa mga myembro sa Sangguniang Kabataan sa mga munisipyo ug barangay kauban si Sarangani SK Provincial Federation President Board Member Reymar Dian, nahisgutan ang dungag pa nga kalambuan ug partnership alang sa youth sector, sa pagsuporta nila Senador Manny ug Congressman Ruel Pacquiao, Sangguniang Panlalawigan ug mga mayores.
* Atong paminawon ang magsuon nga kambal sila Jesse ug Christian Perkins, ang Fil-Am pop sensation nga Perkins Twins:
