Roxas City, Capiz – Ginalauman nga masumiter na sa opisina ni Capiz Governor Esteban Evan Contreras ang final report angut sa ginpatigayon nga fact finding investigation sa mga reklamo kontra kanday Admin Officer Andreo Llaver kag Provincial Jail Warden Arjuna Yngcong sang Capiz Rehabilitation Center.
Suno sa hepe sang ginbug-os nga fact finding body nga si HR head Francisco ‘Bobot’ Dariagan, gina-ekspektar nga kun matapos nga mabalay ang final report ini ang igapasa sa gobernador sa maabot nga adlaw sang Biernes.
Madumdoman, ginpang-reassign anay sanday Yngcong kag Llaver sa opisina sang Provincial General Services Office samtang ginapatigayon ang imbestigasyon.
Samtang temporaryo anay nga tagdumala sang CRC amo si GSO head Eduardo ‘Boy’ Apa-ap.
Sa matandaan, nangin kontrobersyal sadto si Llaver matapos nga ginreklamo ini sang mga inmates sa Capiz Rehabilitation Center angut sa ginapahayag pagdiskarte sini sa mga nagabisita nga asawa sang mga inmates sa amo nga pasilidad.
Sa interview sa tagreklamo nga inmate, ginpahayag sini nga nagbisita sa CRC ang iya asawa sang nakaligad nga bulan sang Mayo 2020. Nahibaluan niya nga gintanyagan ni Llaver ang iya asawa nga sugaton kag idul-ong ini halin sa ila poluy-an pakadto sa CRC. Ginpangayuan pa niya ini sang contact number. Suno pa sa asawa sang inmate, kun indi ini magpasugot gipiton ang iya bana nga yara sa sulod sang Capiz Rehabilitation Center.
Nagakabalaka ang nasambitan nga mga tagreklamo bangud sa posibilidad nga mabutang sa delikado nga sitwasyon ang ila kabuhi sa sulod sang presuhan.
Si Llaver ang nahibaluan nga gin-assign sa CRC sadtong tuig- 2016 bilang jail guard apang ini ang na-promote nga administrative officer.
Nahibaluan nga maluwas sa amo nga alegasyon, may yara pa sang isa ka inmate ang nagpalab-ot sang reklamo nga ang asawa sini kag ang nasambitan nga si Llaver ang may yara sang relasyon.
Ginsiling sini nga magaduha na ka tuig nga wala makabisita(dalaw) sa iya ang iya asawa.
Apang may nakalab-ot sa iya nga impormasyon nga masami makit-an nga magkaupod sa guha ang ginareklamo nga si Llaver kag ang iya asawa.
Suno sa alegasyon, nagabusong na sa subong ang iya asawa kag ang ginatudlo amay, amo si Llaver.
Samtang sa pihak nga bahin, nakalab-ot man sa talatapan ni PA Edwin Chinel Monares ang reklamo nga pagpahanugot ni Jail Warden Arjuna Yngcong sa pagpatukod sang mga ‘kubol’ kag iban pa nga mga reklamo.
