Wala sang may nakita nga problema ang More Electric and Power Corporation sa indi pa pagpirma ni Presidente Rodrigo Duterte sang ila franchise para mangin bag-o nga power distribution utility sa syudad sang Iloilo.
Ini apisar nabaton na sang *Presidential Legislative Liaison Office sang Enero 16 ang *final version sang Congress para sa franchise sang MORE.
Suno kay Mr. Roel Castro, presidente sang MORE kon indi mapirmahan sang presidente ang ila prangkisa ,ma-lapse into law na ini sa sulod sang 30 ka adlaw.
Samtang ginkalipay naman sang MORE ang nangin pahayag sang Panay Electric Company (PECO) nga bisan ma-expire ang ila franchise bwas nga adlaw, Enero 19, magapadayon ang ila pagserbisyo sa syudad sang Iloilo pinaagi sa Certificate of Public Convenience and Necessity ukon CPCN tubtob sa Mayo 25, 2019.
Suno kay Castro, indi sila magpasilabot sa operasyon sang PECO kag magapabilin sa status quo ang operasyon sa syudad.
Apang ginpahayag ni Castro nga sa tion nga mapirmahan na ang ila franchise kag mangin isa na ka layi , ila na i-take over ang PECO.
Nagpasalig naman si Castro nga preparado na ang mga personnel sang MORE para sa transition period.
Ginpahayag ni Castro nga bukas ang MORE sa pagbaton sang mga empleyado sang PECO nga luyag mag-upod sa ila.
Apang iya gin-athag nga magaagi sa proseso ang mga ini agud mas mangin maayo ang ila pagserbisyo sa idalom sang bag-o nga management.
Ginpasiguro ni Castro nga sa tion nga magsugod na ang operayon sang MORE, isa sa ila mangin prayoridad ang paghatag sang maayo nga customer service sa mga konsumidor.
(photo from web)
