Davao City – Gikatakdang motunol ang City Government of Davao og pinansyal nga tabang sa mga lugar nga naapektuhan sa bagyong Odette.
Gibutyag ni Alfredo Baloran, hepe sa Davao City Disaster Risk Reduction and Management Office (CDRRMO) sa interbyu sa city-owned radio, adunay direktiba si Davao City Mayor Sara Duterte-Carpio sa pagtunol og financial aid sa apektadong mga lugar nga kuhaon sa Quick Response Fund (QRF) gikan sa Disaster Risk Reduction and Management Fund (Calamity Fund) sa lokal nga gobyerno.
Segun ni Baloran nga kinahanglan usab nga magdeklara ang affected areas og state of calamity aron mas mapadali ang pagproseso sa dokumento ug gilayong mapaabot ang tabang sa nahisgutan.
“Naay instruction man gud si Mayor nga muhatag ‘ta og hinabang didto. Kinahanglan namo ilang declaration of state of calamity (sa affected province, city, o municipality) kay mao man gyud na siya ang attachment namo sa pagpangayo nato, pagpa-approve nato sa city council,” sulti ni Baloran.
Una na nga nagpadala ang Local Government Unit (LGU) Davao og mga personahe nga gilangkoban sa mga doctors, social workers ug rescue personnel partikular na sa Bohol.
Nagpadala usab ang lokal nga gobyerno og heavy equipment sa Surigao del Norte aron motabang sa clearing operation sa mga area nga natabunan tungod sa bagyong Odette.
Samtang, nagdeklara na si Presidente Rodrigo Duterte og State of Calamity sa mga lugar nga apektado sa bagyo partikular na sa Regions 4B, 6, 7, 8, 10, ug 13.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
