Davao City – Una pa man opisyal magsugod ang Fire Prevention Month sa bulan sa Marso, ni-arangkada na ang Bureau of Fire Protection (BFP-XI) sa ilang fire awareness campaign gani nakatala na og kapin napulo ka insidente sa sunog ang siyudad sulod lang sa usa ka semana karong bulana.
Matud ni BFP-XI Public Information Officer Fire Inspector Cyrus Medina, gikan sa petsa 18 hangtud sa 22 karon nga bulan, mukabat na sa 14 ka insidente sa sunog ang nahitabo sa dakbayan.
Sa maong gidaghanon, ang pinakadaku nga sunod nga sila-ob sa Isla Verde sa Barangay 23-C diin 200 ka balay ang na-ugdaw ug kapin lima ka gatos ka pamilya ang naapektuhan kinsa kadaghanan kanila mga Badjao.
Nasuta nga usa ka wala nganli nga Badjao ang midabdab sa iyang pinuy-anan sa wala pa masayri nga hinungdan ug sanglit gama sa kahoy ang sagad sa mga balay, paspas gilamoy sa kalayo ang kasikbit nga mga panimalay hangtud naabo.
Apan gitino ni Medina nga subay sa ilang imbestigasyon, sagad rason sa sunog mao ang electrical short circuit nunot sa wala ma-unplug nga mga appliances ug daw ‘octopus’ nga linya sa mga kuryente.
Gisulti pa ni Medina nga usa ka 52 anyos nga paralisado ang namatay sa sunog sa Agdao human nga wala kini makagawas samtang gikaon sa dakung kalayo ang iyang balay mientras usa ka bombero ang angol.
Gibutyag ni Medina nga hangtud karon problema pa gihapon ang gagmay’ng mga dalan ug ang dikit-dikit nga mga balay busa imbes mapadali ang ilang pagresponde, malangay na hinoon.
Ug ang suliran pa gyod hangtud karon mao ang kakulang sa mga kagamitan ug fire trucks apan maayo na lang kay naa’y volunteer fire brigade ug Central 911 fire brigade nga miabag diha sa pagresponde sa mga sunog.
Kabahin sa programa nga gipatuman sa BFP-XI karon mao ang pagbansay sa mga taga-barangay aron mahimo silang unang responders sa mga insidente sa sunog nga mu-ulbo sa ilang mga dapit.
RadyoMaN Joel Viray
