Davao City – Gipalanog ni I-ACT Deputy Director Elmer Organo nga panahon na aron himoong standardized ang industriya sa transportasyon ug i-professionalize ang mga driver sa mga bus nga sa karon magdepende lang sila sa income sa ilang pamasada.
Gipunting ni Organo ang daw biyaheng ementaryo sa mga drivers sa mga bus nga nagresulta sa ngilngig nga disgrasya tungod sa ilang pag-inapasay sa dakong income nga maoy gibasihan sa ilang kitaon matag adlaw.
Dili na maihap sa kumagko ang mga disgrasya sa mga kadalanan nga gisambugan sa nagkadaiya nga pampublikong sakyanan sama sa bus kung asa dili na usab maihap ang gidaghanon sa mga nangamatay sa tibuok nasud.
Busa daku ang pagtoo ni Organo nga kung hatagan og klaro nga sweldo ug mga benepisyo ang mga drivers ug mga conductors, wala na unya’y mga disgrasya mahitabo sa dalan ug wala na’y mga pasahero mangamatay sa biyahe.
Rekomendasyon pa ni Organo nga apilon usab sa fixed salary scheme ang mga drivers ug mga conductors sa PUJ ug PUV sa ngalan sa mas luwas nga biyahe sa mga pampublikong transportasyon sa tibuok nasud.
RadyoMaN Joel Viray
