General Santos City–Hingpit nang napasakaan ug kaso sa Polomolok PNP ang lima ka mga personahe nga una na nilang nasikop sa sunod sunod nga anti-illegal drug operation sa lungsod.
Sumala ni Police Chief Inspector Alex Joe Orcajada, Chief Of Police sa Polomolok PNP nga ila nang napasakaan tanan ug kasong kalapasan sa Republic Act 9165 kon Comprehensive Dangerous Drug Act of 2002 ang mga suspek.
Nasayran nga una nang nadakpan ang usa ka suspek sa may Barangay Magsaysay, gisundan kini sa pagkasikop sa duha ka mga babaye sa barangay Cannery ug uwahing nasikop ang laing duha pa sa operasyon nga gihimo sa Barangay Poblacion.
Dugang pagbutyag ni PCI Orcajada nga pipila sa lima nila ka dinakpan adunay koneksyon sa pagpamaligya ug iligal nga droga.
Nasayran nga ayha nila gihimo ang operasyon batok sa ilang mga target nagpahigayon una sila ug surveillance ug test buy. Dihang nakumperma ang kalambigitan sa mga nasangpit sa iligal nga droga, gihimo dayon ang operasyon nga misangko sa pagkasikop sa mga suspek.
