General Santos City–Aduna nay ginatan-aw nga persons of interest ang kapulisan bahin sa pagpusil patay kang Barangay Tambilil, Kiamba Kapitan Reynardo Amador.
Gibutyag ni Police Inspector Marlon Ramirez Deputy Chief of Police sa Kiamba PNP, duna silay gihuptan nga witness nga mismo nakakita sa dihang gipusil patay ang kapitan.
Dili pa hinuon mahinganlan sa kapulisan kung kinsa ang gitumbok nga suspek apan posible matud pa nga ila nang mapasaka ang kaso batok sa mipusil.
Giangkon usab ni Police Inspector Marlon Ramirez nga hangtod karon wala pa gihapon nila ginapadaplin ang anggulong pulitika gumikan kandidato man sa umaabot nga eleksyon ang maong kapitan.
Una nang migula sa imbestigasyon sa kapulisan nga daan nang nakadawat ug bahad si kapitan Amador ayha kini gipusil atubangan lang sa ilang pinuy-anan.
