Food for work sa brigada eskwela ginpatuman sang provincial government sang South Cotabato.

Ginpatuman sang provincial government sang South Cotabato ang food for work bilang suporta sa implementasyon sang Brigada Eskwela sang Department of Education ukon Dep. Ed. sa mga eskwelahan nga nagrequest sang bulig sang lokal nga panggobyerno paagi sa Provincial Disaster Risk Reduction and Management Office.
Suno kay PDRRM Action Officer Mila Rivera gin-identify nila kon ano nga assistance ang ihatag kag tungod ang konsepto sang brigada eskwela ang bayanihan paagi sa pagpanglimpyo sa palibot agud nga mangin handa ang eskwelahan sa pag-abri sang klase sa Hunyo 4 ginpatuman nila ang food for work.
Isa sa gintutukan ang paglimpyo sa drainage canal sa mga eskwelahan agud nga malikawan ang posible pagbaha sa pag-abri sang klase kag kabaylo sini ang paghatag sang kaunon sang mga nagbrigada eskwela nga mga ginikanan sa pagpauli sa ila nga puluy-an matapos nga ginsakripisyo ang pagpangita sang ila nga kalan-on sa amo nga adlaw.
Ginkumpirmar man ni Maam Rivera nga kabahin man sang brigada eskwela nagpatigayon man sang earthquake drill sa mga eskwelahan ang pipila ka mga Municipal Disaster risk reduction and Management Office kapareho na lamang sa banwa sang Tantangan.