Tulo ka tawo nga naglakip og duha ka mga batang lalaki ang nakabsan sa ilang kinabuhi human naanod sa kusog nga sug sa sapa sa Sitio Riverside, Brgy.Guadalupe sa syudad sa sugbo atol sa pagbunok sa kusog nga uwan sa sugbo kagahapon sa buntag .
Giila ang mga biktima nga mao ang magsuong John Carlo, 8-anyos ug Juros Taran, 9-anyos, ug usa ka hamtong nga si Arturo Cabradilla, 26-anyos .
Ang maong mga biktima giingong lakip sa grupo sa mga tawo nga nipatong sa usa ka kahoy nga foot bridge samtang misaksi sa pagdakop sa usa ka dakong sawa sa maong sapa .
Apan ang maong foot bridge nahugno hinungdan nga sobra sa napu ka tawo ang natagak paingon ngadto sa sapa, nangaanod ug pipila kanila ang nangaangol .
Duda sa usa sa mga residente nga nitabang sa rescue operation atol sa panghitabo nga posibleng nabug-atan ang foot bridge sa nagpatong nga mga tawo niini ug ang kusog nga uwan maoy hinungdan sa pagkahugno sa maong gamay nga tulay nga giingong gabok na .
Niabot pa og pipila ka oras una napalgan ang mga lawas sa biktima nga wa’ na’y kinabuhi diin si Juros nakit-an nalang sa sapa duol sa laing barangay sa syudad sa Labangon ug si John Carlo nakit-an duol sa South Road Properties kun SRP samtang si Cabradilla na-rekober na sa Banawa area sa dakbayan sa sugbo .
Plano sa barangay kapitan sa Guadalupe, Michael Gacasan, pag-ayo sa kahoy nga tulay nga mao lamang ang agi-anan alang sa sobra napu ka pamilya nga namuyo duol sa area diin nahitabo ang insidente paingon sa main road .
Apan tinguhaon ni Gacasan ang paghangyo sa kagamhanan sa dakbayan pagpangita og relocation site alang sa mga gikonsidera nga illegal settlers nga nahimutang sa maong dapit .
