Force evacuation tagpatuman sa Surigao City sa kahadlok sa bagyong Vinta Tagpatuman na epektibo alas 4:00 kuman hapon an Force Evacuation sa pipila ka mga landslide prone ug low lying areas sa Surigao City. Ini agig paghimo nan pagpangandam na dili mabutang sa peligro an pipila ka residente sa pag-abot nan bagyong Vinta. Ini an nasabutan na lakang sa dihang otro na nagtigom ganina hapon an mga naglangkob sa City Disaster Risk Reduction Management Council sa pagpanguna nan Acting Mayor Vice Mayor Alfonso Casurra. Tagtudlo na gumikan sa pagpadayag nan kadagkuan sa PAG-ASA na maghatud nan grabe na pag-uyan an bagyo, isa sa nakit-an na pre-emptive measure an pagpabakwit sa mga residente ngadto sa mas luwas na lugar. Gumikan sa pag-isa sa Signal No. 2 sa Surigao City, wayay tagtugutan na makabiyahe na mga sakyanang pandagat. Ugani sa report nan kadagkuan sa Phil. Ports Authority moabot na sa 372 an mga na-stranded na pasahero lakip an 20 ka mga sakyanan suyod sa PPA sanan may 72 isab ka laing sakyanan gawas sa PPA Port. Sa kahadlok isab na basin maapektuhan an edipisyo nan PPA sa bagyong Vinta labi na kay duol sila sa dagat, an mga sakyanan ug mga pasahero sa Lipata Port an tagpabalhin anay ngadto sa Surigao Integrated Bus and Jeepney Terminal ug tagsira sa kasamtangan an mga pantalan nan PPA. Naka-standby kuman an mga responders sa CDRRMC sa pag-responde kon moigo an bagyong Vinta.
