Dead on arrival sa ospital ang isa ka lalaki, matapos nga tiruhon sang riding in tandem criminal sa Brgy. Concepcion, Koronadal City, pasado alas 3:00 subong nga hapon, Marso 9, 2021. Ginkilala ang biktima kay Andy Minola Talib – 37-anyos, residente sang Brgy. Koronadal Proper, Polomolok, South Cotabato. Suno kay P/Lt. Reynaldo Sotelo ang biktima ang foreman sang FRIAS construction sa ginaconstruct nga district hospital sang DOH-12 sa Brgy. Concepcion. Base sa ila nga imbestigasyon gintiro ang biktima sang mga suspek sa sulod mismo sang ila nga bunkhouse malapit sa barangay hall. Nakaangkon naman ang biktima sang tatlo ka igo sa lawas kag isa sa ulo nga nangin tunaan sang iya hinali nga kamatayon. Ginkumpirmar ni Sotelo nga narekober sa crime scene ang apat ka basyo kag bala sang kalibre 45 nga armas luthang. Gilayon naman nga nagpalagyo ang mga suspek nga nakasuksok sang bonnet, facemask kag sakay sa Suzuki raider motorsiklo matapos nga mahimo ang krimen. Sa subong nagapadayon ang imbestigasyon sang Koronadal CPS sa motibo kag responsable sa nasambit nga pagpangluthang.
