Sarangani Province—Napuno sa mga bisita kagahapong adlawa, adlaw nga Martes, ang probinsya sa Sarangani tungod kay laing batch sa gabinete ni Pangulong Rodrigo Duterte ang nibisita.
Anaa mismo kagahapon ang kanhing Presidential Adviser for Political Affairs ni Presidente Duterte og higala ni Governor Steve Chiongbian Solon nga si kanhing MMDA Chairman Atty. Francis Tolentino. Nibaba pud kagahapon sila DILG Assistant Secretary Alexander Macario og Department of National Defense Assistant Secretary Angelito De Leon.
Anaa sila sa Sarangani aron personal nga saksihan kagahapon ang launching sa “Oplan KAPANALIG” campaign ni PNP Regional Director General Eliseo Rasco aron hugot nga batukan ang kriminalidad, og ang pormal pud nga paglusad sa gipahugtan nga programa sa lokal nga gobyerno aron labanan ang terorismo gitawag nga P.C.V.E. kon “Preventing and Countering Violent Extremism” ilalum sa Sulong Kapayapaan program sa gobernador.
Gidayig ni Francis Tolentino si Governor Solon tungod sa pagmugna sa maong aktibidad nga ginaapil og ginalambigit ang mga ordinaryong tao sa barangay og komunidad, timaan matud pa nga seryoso ang lokal nga panggamhanan nga pangandaman pirme ang seguridad. Nindot matud pa ang ginabuhat sa Sarangani Province nga padayon nga gina-training ang mga taga-barangay. Nahimo matud pa syang mayor sa Tagaytay City sa edad nga 24 anyos straight for 9 years, maong batyag niya ang mga programa nga adunay partisipasyon og pagtinabangay sa mga katawhan hilabi na sa hisgutanang peace and order.
