Roxas City, Capiz – Ginhangkat ni former Provincial Administrator Michelle Del Rosario ang subong nga provincial administrator nga si Edwin Chinel Monares nga pamatud-an sa tawo nga takos ini sa iya posisyon.
Ini matapos sang pahayag anay ni Monares nga wala kuno sang may ginbilin nga lista ukon credentials sang Aksyon Agad scholars ang nakaligad nga administrasyon.
Ginpahayag sang anay provincial administrator nga may kompleto nga listahan ang mga Aksyon Agad Scholars nga ila ginbilin sa opisina sang gobernabor kag provincial administrator antes nagtakop ang administrasyon ni anay Governor Tony del Rosario.
Nagpabutyag man ini sa adminitrasyon ni Gov. Nonoy Evan Contreras nga kon nagakabalaka ini sa mga scholars, sarang nga makapangita sang pondo agud mabayaran ang tuition fee sang mga scholars bisan sa 1st semester na lang para makapadayon ang mga scholars sa 2nd semester.
Una na nga ginpanindugan ni Del Rosario nga kun mga attachment kag dokumento sang mga estudyante ang ginapangita ni Monares, sarang ini makita sa PGSO.
