General Santos City—Balatian maoy gitudlong hinungdan sa kamatayon sa usa ka 73 anyos nga si Roberto Lajo, nga taga Lansones Street., Barangay North, Gensan kansa una nang nakaplagang wala nay kinabuhi sulod sa iyang panimalay alas 9:00 ang takna kagahapong adlawa.
Subay sa inisyal nga imbistigasyon sa kapulisan nasuta nga nag-inusara ra ang biktima sa iyang panimalay ug posibling kini gi-atake sa iyang balatian nga maoy hinungdan sa iyang kamatayon.
Nasayran nga anaa na sa state of decomposition ang lawas sa nasangpit dihang nakaplagan sa iyang mga silingan.
Gikaingong natingala ang mga silingan sa biktima human nga wala na kini gawas-gawas sa iyang panimalay mao nga ilang gisuta ug didto na nakit-an ang patayng lawas sa nasangpit.
Sumala usab sa anak sa biktima nga si Mark Lajo, uwahi niyang gibisita ang iyang amahan niadtong Hunyo 2, ug wala gyud siya magdahum nga mahitabo kini sa iyang amahan. Giangkon usab sa nasangpit nga adunay balatian ang iyang amahan.
