General Santos City–Padayong giila ang patayng lawas sa lalaki nga nakaplagan sa plantasyon og pinya sa munisipyo sa Polomolok probinsya sa South Cotabato gahapon sa buntag.
Matod sa impormasyon gikan ni Police Senior Inspector Romeo Albano Jr. alas-8:40 matod pa sa buntag dihang nakit-an sa duha ka operator og boom spray sa plantasyon nga sakop sa Purok 2 Barangay Crossing Palkan sa maong munisipyo.
Giila ang mga nasangpit nga nakakita sa patayng lawas na silang Eddie Vanzuela og Eugene Cadorna.Nasuta sa gihimong imbestigasyon sa kapolisan sa munisipyo nga may duha ka samad dinunggaban igo sa nawong ang maong biktima.
Nakasul-ob sad kini og orange t-shirt, pula nga short pants, straight ang buhok og bana-bana 50 anyos ang panuigon.Ning panahona gipailawom sa follow up investigation sa kapolisan ang maong kaso aron masayran kung kinsa ang nihimo sa krimen. (Orlan Jumawan)
