Davao City – Gumikan sa pagsaka sa presyo sa mga nag-unang palaliton nunot sa epekto sa Tax Reform for Acceleration and Inclusion kun TRAIN Law hayan nga daghan sa mga kabataan dili makasaka sa laing ang-ang sa pagtoon bisan og libre na unya ang edukasyon sa kolehiyo ug unibersidad pinaagi sa Tertiary Free Education Law.
Gibutyag ni Akbayan Partylist Representative Tom Villarin nga dakung dagok gihapon sa gobyerno ang posibilidad sa pagbaha sa mga kabataan nga mawad-an og oportunidad nga maka-eskwela sa buwan sa Hunyo bunga sa kalisod nga gisagubang sa mga ginikanan mugna sa TRAIN Law.
Dugang niini nga bisan og naggahin ang kagamhanan og 40 bilyones ka pesos alang sa free education apan dili gihapon kini makasapar aron masuportahan ang mga estudyante sa adlaw-adlaw nga panginahanglon sa ilang pagtoon.
Matud ni Villarin nga niadtong buwan sa Marso misaka og 4.1 percent ang presyo sa mga palaliton ug musaka pa kini ngadto sa 6% pag-abot sa Hunyo diin gilauman nga mumahal pa gyod ang basic commodities ug ang mga school supplies nga magpabug-at og samot sa mga ginikanan.
Nabalaka ang magbabalaud nga basin mapugos ang mga ginikanan sa pagpatrabaho sa ilang mga anak ug maghitak na hinoon ang child labor diin mibalibad una ang kongresista sa paghatag og assessment sa kahimtang sa unang batch nga migradwar sa K-12 tungod kay sayo pa kaayo alang niini.
Gumikan sa pagtumaw sa mao nga problema, giingon ni Villarin nga ang Akbayan partylist naglaraw sa pagduso og Expanded Cash Transfer Act sa kongreso ug kabahin sa provision ang pagpalig-on sa livelihood program alang niadtong anaa sa poverty line.
Gipasabot ni Villarin nga tumong niini mao ang pagsustiner sa igong income sa mga ginikanan nga dunay mga anak ginasuportahan sa pagpa-eskwela ug masiguro nga makahuman sila sa sekondariya ug sa kolehiyo uban sa dakong tabang sa Free Education Act.
RadyoMaN Joel Viray
