Zamboanga City- Sumido ahora na avenida el nueve maga sitio del brgy Vitali sigiendo con el el sin descanso aguasero.
Asegun con el Brgy Capitan Joselito Alavar que ele mismo ya man bacul na area del sitio Tamion por causa bien alto tambien el agua, y cuantos del maga residentes el ta pidi ya ahora assistencia despues que ta continua pa el aguasero y no puede mas sila sale na diila maga caserias cae mismo el maga vehiculo ta pasa ya tormento na pasada por causa con el altor del avenida.
El maga sitio ya sale affectao amo el Tindalo, Camino nuevo, SPDA, Mialim, Bataan, Tamion, Tagpangi, Riverside, y Taloptap, donde ta man lingasa ahora el maga residentes despues que ta continua pa el fuerte aguasero.
El consejal del ciudad Mike Alavar ya habla que cuantos del maga siembrador el ya pidi assistencia conele despues que sale tambien estos bien affectao, y base na su monitoring na lugar, mas ta ancha pa el maga lugar que ta sale ahora affectao del avenida.
Del mas temprano, ya embia ya tambien maga personajes del CDRRMO y maga police bajo na Public Safety Company paraber assisti con el maga affectao residentes.
Mientrastanto, ta continua tambien ahora man monitor el CDRRMO con el maga coastal brgys despues que cuantos del maga residencia el ya sigi man anud na maga grande marijada.
