Davao City – Hangtud aduna pay mga sindikato nga nagpahimulos sa kalisud sa pamilyang Pilipino, dayag na lang nga dili usab mawala ang pornograpiya dinhi sa Pilipinas.
Kini maoy baruganan nga giluwatan karon ni Gabriela Partylist Representative Emmie De Jesus kinsa nagkanayon nga ang pornograpiya usa ka matang sa abuso sa kababayen-an diin gigamit nga armas sa mga sindikato ang kapobrehon.
Segun ni De Jesus, bisan kun pila ka balaud pa ang pandayon ni Sen. Tito Sotto aron i-ban ang porn sites dinhi sa Pilipinas apan kung naglisud gihapon ang pamilyang Pilipino, dili gayud ma-undang ang pornograpiya diha sa internet.
Gani kamatuoran ani, aduna pa’y mga ginikanan gihimong puhonan ang lawas sa ilang mga anak pinaagi sa pagbaligya sa ilang mga lawas diha sa internet aron mabuhi.
Mao nga dili gihapon epektibo nga solusyon kontra pornograpiya ang istriktong implementasyon sa mga balaod batok sa sindikato sa Human Trafficking hinoon makibhan ang susamang mga kaso.
Kung tinguha gyod sa gobyerno nga mawala ang porno sa nasud mas maayo kun magmugna og daghang trabaho ang kagamhanan aron makabaton og tarong nga trabaho ang mga ginikanang Pilipino.
Daku kining hagit karon ngadto sa pamunuan ni Pres. Rodrigo Duterte kung unsaon matabangan nga mahaw-as gikan sa kalisud ang pamilyang Pilipino aron dili ma-exploit sa mga sindikato.
Sa pikas bahin, mas dismayado si De Jesus sa bag-ohay nga ‘rape joke’ ni Duterte kay sama ra nga gipaubos mismo sa pangulo ang dungog ug dignidad sa mga kababayen-an imbes nga protektahan ug i-preserba.
RadyoMaN Joel Viray
