Davao City – Usa ang Gabriela partylist nga nagapanikad nga mahinayon ang naputol nga peacetalk tali sa GRP ug sa CPP-NPA-NDFP.
Gani kabahin ang Gabriela sa pagduso og resolusyon sa kongreso aron aghaton ang kagamhanan ni Pres. Rodrigo Duterte nga mubalik na sa lamesa sa hinabing pangkalinaw uban ang CPP-NPA-NDF.
Segun ni Congresswoman Emmie De Jesus nga naka-ung-ong na unta ang pagtuki sa unod sa CASER dihang gipahunong ang peacetalk ni Duterte.
Busa nanghinaot si De Jesus nga mahatagan na unta og katumanan ang patapsing ni Duterte nga banhawon pag-usab ang peacetalk kung magpakita og sinseridad ang CPP-NPA-NDFP.
Gitugyan na ni De Jesus sa National Democratic Front of the Philippines ang pagpakanaog og hukom kun dawaton ba o dili ang mga kondisyon ni Duterte nga iyang giyagyag isip susi sa pag-abli sa pultahan sa peacetalk alang sa CPP-NPA-NDFP.
Sanglit dili makasiguro ang magbabalaud kun aduna ba’y katakos ang pamunuan sa mga armado sa mga kumunista sa paglatag sa ilang hukom labot sa tulo ka kondisyon sa pamuno-nasud.
Kabahin sa mga kondisyon sa gobyerno mao ang pag-undang sa extortion, pagpanunog, ug ceasefire diin nagpadayag og kaandam si Jose Maria Sison sa pagbalik sa peacetalk.
Hinoon tik-op ang baba niini kun ila bang sanungon ang buot mahitabo sa kagamhanan gawas sa gipamugos nga buhian ang mga kaubanan ni Joma nga napreso tungod sa lahi-lahing kasong kriminal.
Apan gibarugan ni De Jesus nga wala gihapon kini pagsalig sa mga pamahayag ni Pangulong Duterte sa rason nga ga-usab-usab ang mga istorya sa pamuno-nasud hilabi na kun mahulhugan na sa armadong kusog sa Pilipinas ug sa Estados Unidos.
Busa hagit sa representante kang Duterte mao nga dili maminaw sa hunghong sa national defense ug sa armadong kusog aron mahikutar gayod ang peacetalk nga idlas gihapon hangtud ning tungora.
RadyoMaN Joel Viray
