Davao City – Luwas na sa peligrong kahimtang si Police Officer 3 Romy Cruz kinsa aksidenteng nabarilan sa iyang kaubanan ug padayon nalang kini karong nagpaalim sa MCDC Hospital sa Digos City.
Gibutyag ni Davao del Sur Police Provincial Director PSSUPT. Samuel Gadingan nga nagpahigayon na og administrative investigation ngadto sa nakapusil nga si Police Officer 1 Jeffrey Baluya samtang gipailawom kini karon sa restricted custody human sa insidente.
Base sa report galimpyo ni Baluya sa iyang Glock 17 (9mm) pistol dihang kalit kining mibuto og aksidenteng naigo sa tiyan si PO3 Cruz.
“Aduna gyod siyay tulubagon kay iyaha manang responsibilidad. Mga bag-o mani natudluan mani og basic kung maglimpyo man ka’g pusil siguraduhon nimo nga layo ka sa mga tao kay kung inkasong mubuto wala kay maigo and clear mo muna ang baril una ka maglimpyo,” sumala ni Gadingan.
Gidisarmahan na ang pulis nga nakapusil ug gikuha kaniya ang long ug short firearms niini samtang ginaapabot pa karon ang resulta sa imbestigasyon.
Matud ni Gadingan aduna pod tulubagon si PO1 Baluya sa galastuon sa ospital ni PO3 Cruz.
RadyoMaN Aimee Guinita
