Gahimo og pekeng mga dokumento, nasikop

397
PC: RadyoMaN Jonathan Bullo

Nasikop pinaagi sa entrapment operation sa Divisoria Police Station ang usa lalaki human nakigkunsabo sa lain pang duha ka mga suspek paghimog pekeng mga dokumento dinhi sa Cagayan de Oro.

 

Matud ni Chief Inspector Julius Clark Macariola,  Hepe sa Divisoria Police station nga ang suspek mao si Albert Sarmiento,  42 anyos nga taga Sitio Macanhan ning syudad.

 

Mga alas 11 kagahapon sa buntag si Macariola ug mga kauban, naglunsad sa Entrapment Operation sa dalan Velez-Gomez ning syudad.


 

Ang wala mahibaw-e sa maong suspek nga police man diay ang nagpahimo kaniya sa usa  ka pekeng diploma.

 

Sa dihang natapos na sa maong suspek ang paghimog pekeng diploma, gidakop dayon kini sa mga otoridad, gipusasan ang iyang mga kamot ug gidala sa Divisoria police station ug gipaubos sa makuting imbestigasyon.

 

Atol sa imbestigasyon sa Divisoria police, giangkon sa maong suspek nga stamp maker ang  iyang trabaho ug nakigkunsabo  siya sa lain pang duha ka mga suspek paghimog pekeng mga dokumento.



 

Gitudlo ni Sarmiento, ang lain pang duha ka mga suspek nga sila Mario Ampoon ug Gina Salduha, kinsa naka-ikyas sa kamot sa mga otoridad.

 

Na-imbargo sa mga otoridad gikan kang Sarmiento ang lain laing pekeng mga dokumento nga naglakip niining mga mosunod:

 

Tulo ka pekeng diploma  ug usa  ka transcript of record sa Cagayan de Oro College Phinma, duha ka diploma sa Cagayan University,  duha ka  diploma sa Bartolome Lira Senior National High School sa Lanao del Norte, usa ka diploma sa  Lourdes College sa Cagayan  de  Oro,  duha ka diploma sa Arsenio Aquibranza  National High  school sa Lanao del Norte, usa ka transcript of  record sa  University of Science and Technology  of Southern Philippines kon USTP  dinhi sa Cagayan  de  Oro, duha ka good Moral Character  sa MOGCHS,  usa ka Mayors Permit sa City hall,  duha ka  barangay clearance sa barangay Indahag, usa ka Certificate of  Baptism, usa ka Certificate sa  TESDA, usa ka live Birth Certificate , ug  tulo ka Marriage  Certificate  gikan sa City Civil Registrar sa  City hall.,  usa ka SSS ID, Usa ka Temporary Driver License sa LTO, ug uban pang pekeng mga dokumento.

 

Nakuha usab sa mga police gikan sa  maong suspect ang 1,200 pesos nga marked money, 1 unit type writer, usa ka cell phone,  usa ka Original Copy sa  Certificate  of Completion gikan sa  Coast Guard Education and training  Command.

 

Karong  adlawa nakatakdang pasakaan og kasong Falsification of Documents ang suspek sa buhatan sa City fiscal pinaagi sa Inquest Proceeding.

 

Lakip sa mag-atubang  sa maong kaso, sila si Mario Ampoon ug  Gina Salduha nga gipangita pa karon sa mga otoridad.

 

Facebook Comments