Davao City – Malisud apan angay lutoson: Kini ang komon nga impresyon sa katawhan sa hisgotanang paggukod dili lamang sa mga gagmay’ng illegal numbers game ushers ug coordinators apan ilabi na mga dagkung mamsa kun tigpaluyo sa pasugal.
Sa programang ‘Straight to the Point’ sa DXDC 621 RMN Davao, gipaambit ni Dr. Christopher Ryan Maboloc, assistant professor of Philosophy sa Ateneo de Davao University (ADDU) nga masalimuot ang topikong illegal gambling sanglit isyu kining moral ug law enforcement.
Matud ni Maboloc, usa ka dakung hagit sa mga awtoridad mao ang pagpakita ug igong katakos kun ‘political will’ nga may kapasidad kining mogukod dili lamang sa mga ultimo apan ilabi na sa mga gambling financiers ug mga gambling lords.
Sa kabahin sa mga ordinaryong katawhang nahinabi sa atong tulumanon, daghan ang kumbinsido nga aduna gayuy pagkibra sa mga insidenteng pasugal sama sa Last Two dinhi sa dakbayan.
Hinonoa, ubay-ubay usab ang nagtenir ug pagduha-duha sa sinseridad sa mga manakupay sanglit ‘common knowledge’ man usab nga malisud sigpawon ang mga gambling lords ug financiers kun mga bankero sa pasugal sanglit kaya man nilang paliton ang ilang kagawasan gani sayud ang tanan nga mismong mga pulis kun mga awtoridad nakigkomboya sa mga nagpasugal o bin ba kaha sila gihimong mga protectors bugti sa tinaginting sa kwarta.
Gisugilon usab sa Ateneo philosophy professor nga critical issue ang sugyot nga bungkagon na lamang sa hingpit ang gitawag nga mga legalized gambling sama sa PCSO Lotto draws nga gi-utilisar usab sa mga maldito nga basihan sa ilang kaugalingong illegal numbers game.
Dili kini masayon nga krusada sanglit nakatampo man usab sa panginahanglan sa mga pobre sama sa tambal ug social services ang pondong makalap gikan sa mga draw sa PCSO sama sa Sweepstakes Draw, National Lotteries (Lotto), Small Town Lotteries (STL) ingon man Horse Racing, segun sa academician.
Kasamang June Duterte
