Gumikan kay gipasagdan sulod sa taas nga panahon ang Polysports Complex sa brgy. Tiniwisan ning syudad sa Butuan, hina-hinay nang gipanghakot sa mga kawatan ang gamit sulod sa nasangpit nga edipisyo.
Midangop sa Police Station 4 si Engr. Walter Butao aron isumbong sa kapulisan ang iyang nadiskobrihan nga nahanaw na ang walo ka mga industrial fan nga gimontar sulod sa Basketball Court sa nasangpit nga edipisyo.
Sobra ang kagool ni Engr. Butao tungod kay sa iyang gisalig ang nasangpit nga mga butang pinaagi sa Memorandum Receipt (MR) nga sa iya nakapangalan.
Wala gikabutayag sa report kung pila ang kinatibok-ang kantidad sa mga butang nga gikawat apan padayong giimbistigahan kini karon sa kwerpo sa kapulisan.
Kahibaloan nga proyekto ni kanhi Mayor Jun Amante ang Polysports Complex sa brgy. Tiniwisan apan wala kini gigamit ni Mayor Ronnievic Lagnada gumikan kay ubos pa kini sa imbistigasyon sa Office of the Ombudsman.
[image: poly sports complex 3.jpg]
