Maga desconosido suspechao “riding tandem” el ya tira con el dos persona que stava na peryahan de Barangay Lumbangan anoche.
El Divisoria Police Station ya identifica con el maga victima como canda Reynold Lam y Reagan Pasanton, mga residentes de Tetuan que ya man dayaw lang na lugar para juga na peryahan.
Asegun na report del policia que si Lam y Pasanton ya juga largo hora na perya y bien ganao estos anoche. Banda alas-onse ya del noche cuando sila ya decidi volve, y cuando ya llega na vicinidad del Santiago Road, pasalida na Divisoria MCLL highway, el uno del dos suspechao riding tandem que tan rabo ya gale canila na atras, el ya tira canila sin provocasyon.
Ya tupa con el dos victima y ya tumba el diila motorsiclo que ta munta, porcausa del tiroteo, ya sale el cuantos residentes ta queda na canto del camino para man usyoso si cosa el ya rebenta, razon para desaleja el mga suspechao y ya corre para na direksyon del highway, base na testimonya del cuantos testigo na lugar.
Con el dos victima ya aucilla el mga vivientes na lugar esperando con el ambulancia quien ya transporta con el dos para na ospital por el curada medical.
Durante el imbestigasyon del policia na lugar del insidente, ya fuede sila recuvri cingco basiyo del bala de 9mm Beretta caliber pistol.
Ta cre el otoridad cay hold-up el motibo del insidente siendo chene grande cantidad de sen como ganancia na perya el ta carga el dos victima. Nuay pa identificaccion el mga suspechao.
Asegun con el capitan Boy Arcillas na entrevista del RMN Zamboanga, que ta chene sila perya na barangay enconneccion del mga preparasyon del actividades del fiesta para Octubre uno. – *Bhong Simbajon/RMN News*
