Davao City – Napatay sa kapolisan sa Talomo ang usa ka leader sa gang nga ‘Anak ng Muslim Igalang Natin’ nga si Rajid Camis human kini nagpabuto og armas ngadto sa otoridad.
Subay sa report adunay usa ka tricycle driver ang midangop sa Talomo Police Station nga mao si Datu Abzur Pangilan, 31 anyos residente sa Phase 3 Open Space Muslim Village Bangkal ug mi-report kini nga adunay upat ka mga tawo ang miharang kaniya sa dihang pauli na kini.
Sa girespondihan kini sa kapolisan ug nabantayan sa mga suspek nga padulong ang mga otoridad sa ilang gihimutangan mihulbot dayon sila og armas ug nagpabuto.
Nibalos usab sa pagpabuto ang kapolisan ug naigo kining si Camis samtang mikaratil na sa pagdagan ang kakaubanan niini ug nabilin ang.38 nga revolver sa kalsada.
Gidala pa sa Davao Adventist hospital ang suspek apan dead on arrival na kini.
Nakuha ang laing armas nga .38 nga revolver nga anaa sa suspek nga napatay sa kapolisan.
Matud pa nga daghan kasong pagpangawat ug pagpang hold-up ang giatubang sa napatay nga suspek.
RadyoMaN Paul Canono
