Na-alarma na ang pipila ka opisyales sa siyudad sa Malaybalay sa grupo sa mga batan-on nga nagmugna ug kagubot.
Una niini, duha ka biktima sa pagpangdunggab human nga nahitabo ang riot kon rambol sa sentrong bahin sa dakbayan.
Sa interview sa RMN Malaybalay ngadto kang Brgy. 9 Kapitan Rodrigo Timones, gibutyag niini nga ang nahitabong rambol ning nakalabay nga adlaw nahitabo sa Brgy. 8 apan nidagan kini didto sa iyang barangay ug didto nahitabo ang pagpangdunggab.
Matud ni Timones nga ilang nahisgutan ang mao nga problema ni City Vice Mayor Roland Detecio sa ilang panagtigom.
Sigun ninii nga makabalaka tungod kay taliwala sa ka busy sa otoridad sa pagsumpo sa illegal nga droga apan nisiaw usab ang mga gangster nga nagmugna ug problema sa siyudad.
Gibulgar pa sa Kapitan nga adunay mga gangster nga nangilkil sa mga estudyante nga ilang matripingan.
Makalooy matud pa ang mga biktima tungod kay mahurot ang allowance nga gihatag sa ginikanan tungod kay kilkilon lang sa mga gangster.
Kasagaran matud pa sa mga nalambigit ninii mga menor edad ug ang makapabalaka tungod kay kung dili makapangilkil muhimo na hinoon sa pagpangawat.
