General Santos City– Gi-ablihan na sa Gensan Fishport ang Gate 2 aron nga dili magdasok ang mga tawo sa main gate nga bahin pasulod sa fishport complex. Dili buot sa tagdumala sa maong buhatan nga mahitabo pag-usab ang sitwasyon sa unang adlaw sa dihang sobling gi-ablihan ang fishport Market 1-3 human sa lockdown.
Sumala kang Paris Ayon, OIC Chief of The Admin Services sa Philippine Fisheries Development Authority nga ang mga ginatugutan nga mo-agi sa Gate-2 mao lamang ang mga locator sa agro-processing, processors sa mga planta ingon man ang mga truck nga naga-karga ug mga frozen nga mga isda.
Samtang ang mga mo-agi sa main gate mao ang mga motorsiklo ug ang mga nabaktas pasulod sa fishport complex. Pinaagi niini, makunhuran ang hilabihan ka-traffic sa main gate nga bahin. Samtang sa hisgutanang medical certificate, giklaro ni Ayon nga ilahang ginadawat ang mga medical certificate gikan sa mga Rural Health Unit ingon man sa mga company doctors sa mga planta nga anaa sa sulod sa fishport complex.
Mamahimo usab nga magkuha ug medical certificate sa mga pribadong Doctor basta naga-practice ug occupation and safety and health. Kalabot niini, giklaro ni Ayon nga strikto nilang ginapatuman ang oras sa pagpasulod sa Fishport Complex aron nga malimitahan ang ihap sa tawo sa sulod ug dili magdasok. Sumala niya ang mga buyers ang dili dapat magdungan sa alas 5:00 ug alas 6:00 sa buntag gumikan ang maong oras ang para lang sa mga supplier, tag-iya ug timbangan ingon man ang mga laborer.
Dili ikalilong nga tibuok isla sa Mindanao ang gina-cater sa General Santos Fishport rason nga mas gipahugtan nila ang mga ginapatuman nga health protocol sa tanang nagsulod aron nga dili na sobli pang mapa-ilalom sa lockdown ang pipila ka mga lugar sa fishport tungod dako kining epekto sa ekonomiya ug industriya. Kahibaluan nga kasagaran sa mga nagpositibo sa Gensan, South Cotabato ug Sarangani may exposure sa naunang nagpositibo sa Covid-19 human nga miadto pa sa fishport resulta daghan ang natakdan sa virus
