Nagpabilin pa gihapon ang gatosan ka pamilya nga gibakwit sa mga evacuation centers human ang nahitabong engkwentro sa mga militar batok rebeldeng NPA didto sa Barangay Laligan, Valencia City adtong milabayng Biyernes.
Gikatahong miabot sa 85 ka pamilya ang nabakwit gikan sa Purok 14, 31 sa sitio Nagubaan, 13 sa Sitio Villa nga sakop sa Brgy. Tongan-tongan ug 45 ka pamilya sa sitio Narulang sa Brgy. Laligan, Valencia City.
Sumala ni Vice Mayor Dok Paul Murillo nga nahimutang sa San Vicente Elementary School ang kadaghanan sa mga bakwit lakip napud sa uban pang mga eskwelahan sa naasoy nga mga barangay.
Dugang ni VM Murillo nga nahatagan na usab og 10 ka sako sa bugas ang matag pamilya lakip napud ang mga delata og uban pang gamit pagtulog sa mga pamilya.
Gisaysay usab ni Murillo nga hulatan usa ang clearance gikan sa militar ayha ipapauli ang mga bakwit sa ilang tagsa-tagsa ka pinuy-anan.
Sa pikas nga bahin, gibutyag usab ni BriGen. Ferdinand Barandon, Commander sa 403rd Infantry Battalion nga dili muminus sa 10 ka mga miyembro sa NPA ang naengkwentro sa mga military adtong milabayng biyernes didto sa Brgy. Laligan Valencia City diin nasikop ang upat ka mga miyembro sa rebeldeng grupo ug pagkarekober sa unom ka mga tag-as nga kalibre sa armas.
