Davao City – Dili hatagan og kahigayonan ang COVID-19 nga mokuyanap, magpahagba sa atong nasudnong ekonomiya, mudaot sa kaugmaon ingon man mokutlo pa og daghang kinabuhi sa mga Pilipino.
Matud ni Davao City Health Office (CHO) Head Dr. Josephine Villafuerte, dili angay mo-relax or bin ba kaha mo-kumpiyansa ang kagamhanan ug ang mga lokalidad gani kon unsa man ka-istrikto ang mga palisiya sa Enhanced Community Quarantine (ECQ) sama sa social distancing, pagsuot og facemask, FM Pass, district clustering ug uban pa, mao usab gihapon ang angay ipatuman ubos sa General Community Quarantine (GCQ).
Dugang ni Villafuerte, ma-ECQ man o ma-GCQ, angay nga dili na maghasol sa Pilipinas ug sa kinabuhi sa katawhan ang maong virus hangtud makakaplag ug makamugna na og bakuna ang mga eksperto sa syensya ug medisina sa tibuok kalibutan.
Dili pa makasulti si Villafuerte kon angay ba o dili na angay pang lugwayan ang ECQ sanglit mag-depende ang tanan sa dagan ug katikaran sa kaso sa virus sanglit hangtud karon, wala pa’y deklarasyon ang Department of Health (DOH) nga misangko na sa peak point ang maong kagaw or mikunhod na ang mga infected ingon man midaghan na ang naka-recover sa COVID_19 sa Pilipinas gani matag-adlaw, adunay matala nga bag-ong mga kaso, recoveries ingon man kamatayon.
Kon luagan sa nasudnong gobyerno ug sa mga lokalidad ang ilang pagpangandam maingon man ang depensa batok sa COVID-19, basin mas ngilngig pa hinoon ang mogulang epekto sa ‘second wave’ sa pandemic nga mas magpasamot unya sa krisis sa nasud ug nga basin nianang panahona, dili na mapunggan pa ang miserableng kinabuhi sa minilyon ka mga Pilipino.
RadyoMaN Joel Viray
