General Curfew ipatuman sugod kuman gabii sa Surigao City
Sa pamahayag nan Chief of Police Supt. Jay Baybayan, opisyal na sugdan an General Curfew kuman adlawa Enero 8 na kon diin alas 10:00 sa gabii hangtud alas 4:00 sa kaadlawon an tagdili sa bisan sin-o na maglatagaw sa kadayanan. Ini para sa tanan gikan menor de edad hangtud sa hingkod an pangidaron, hinoon exempted ang mga tourism related establishments o may trabaho sa gabii ug an may mga emergency cases.
Sumaya pa niini, sa pagtuntong sa 2018 sunod-sunod na mga insidente sa pagpanlungkab an mitumaw pareho sa nahitabo sa Phil. Information Agency, Cokaliong Shipping Lines office, Globe Telecom sanan iban pa, ini na mga krimen kasagaran nahitabo sa gabii ug sa sajo sa kaadlawon. Para mabalik an kahapsay ug kalinaw, lakip an paglikay sa pagkuyanap nan mga dautang elemento, nauyunan an pagpatuman nan General Curfew.
An tagbasehan an Presidential Proclamation no. 216, an pagdeklarar nan Martial Law sa tibook Mindanao. An City PNP sa suporta nan lokal na gobyerno sa Surigao City an mopatuman sa General Curfew. Hinoon hugot na sundon an tagtawag na rule of law ug an pag-respeto sa tawhanong katungod. An mga masakpan na naglaruy-laroy sa kadayanan ug molapas sa curfew an ipailayom sa beripikasyon ug record check, ajuan an mga ini nan ID ug tagtakda dad-on sa buhatan sa PNP. Kon mapamatud-an na wayay rekord o krimen na nahimo an buhian ra isab.
Dugang pa ni Supt. Baybayan, una na tag-refer nija na ini na plano ngadto kan Surigao City Mayor Ernesto Matugas ug Vice Mayor Alfonso Casurra na pareho nosuporta sa amo na lakang sa curfew.
