BACOLOD CITY – Ginserbihan sang warrant of arrest ang General Manager sang Bacolod City Water District (BACIWA) nga si Engr. Mario Macatangay bangud sa kaso nga grave oral defamation nga ginpasaka batuk sa iya sang anay man general manager sang Baciwa nga si Atty. Juliana Carbon.
Ginserve sang Police Station 1 ang warrant of arrest pasado la una kahapon sang hapon sa opisina mismo ni Macatangay kon diin gilayon man ini nga nakapiyansa matapos nagbayad sang kapin 6 mil pesos.
Madumduman nga nagfile kaso si Carbon batuk kay Macatangay angut sa speech niya sini sadtong nagligad nga Pebrero 13 sa ila flag ceremony kon diin ginsiling ni Macatangay nga isa ka “scheming” woman si Carbon kag ginpang-into ang mga empleyado sang Baciwa.
Nahibaluan nga na-record naman ang amo nga pahayag ni Macatangay kag iban pa nga mga defamatory statement nga amo naman ang gin-gamit nga ground ni Carbon sa iya pagpasaka sang kaso.
Si Carbon ang ginpahalin bilang General Manager bangod nadulaan sang trust and confidence ang miembro sang Board of Directors sa iya bangod wala sini na-address ang problema sang water district.
Ginakontra naman si Macatangay sang Baciwa union bangod sa mga benepisyo nga ginpauntat sini bangod ginbawal sang Commission on Audit nga ginasiling kon si Carbon ang magabalik, iya ini resguhan.
Si Carbon ang ginapabalik sang Civil Service Commission apang indi pa ini final and executory sa diin ang pagsalig sang board nakuha sa gihapon ni Macatangay. /dyHB BACOLOD
