General Santos City–Gidayig ni Gensan City Councilor Atty. Edmar Yumang, committee chairman sa Peace And Order sa Konseho ang kapulisan sa pag panguna ni Police Col. Aden Lagradante ug ang Police Station 3 human nga mapugngan nila nga makasulod sa syudad ang dakong kantidad sa iligal nga droga nga ibagsak unta sa usa ka Normina Pendaliday nga taga Shariff Aguak, probinsya sa Maguindanao dinhi sa syudad.
Sumala pa ni Kagawad Yumang nga kung kaniadto ang target sa mga pulis mao ang pagsikop sa mga pusher nga nagabaligya ug iligal nga droga, karon target matud pa sa mga nasampit mao ang mga supplier o mga nagabagsak niini sa syudad.
Dugang pa niini nga kini matud pa ang unang higayon human nga milingkod kini isip committee chairman sa Peace And Order nga nakakuha ug ingon ka dako nga kantidad sa iligal nga droga ang kapulisan.
Basi matud pa sa nahimong imbistigasyon sa kapulisan nga dili sa syudad sa Gensan gikan ang mga droga nga ginabaligya dinhi sanglit gikan kini sa kasigbit nga mga probinsya sama sa Maguindanao ug uban pang lugar ug hinapalusot pinaagi sa usa ka courier nga nagasakay ug pampasaheroang sakyanan.
Naglaum usab si kagawad Yumang nga masundan sa kapulisan ang susamang mga accomplishment a aron nga mawagtang na ang pagkuyanap sa iligal nga droga dinhi sa syudad. (Dave Silagan)
