General Santos City—duna nay suspek ang GeneraL Santos City Police Office sa pagpatay sa Chief Intelligence operatives sa Tambler Police Station. Kini ang gipamahayag ni Police Superintendent Roel Sermese, ang Deputy City Director for Operation sa pakighinabi sa RMN Gensan.
Kahibaluan nga gipusil patay sa mga riding in tandem si PO3 Clark Bachoco sa may Purok New Bohol Barangay CaLUMPANG Gensan samtang sakay kini sa iyahang motorsiklo pauli sa ilahang panimalay sa may Doña Soledad kaniadtong Setyembre 10 sa kaadlawon.
Dugang pa ni P/Supt. Serense nga kasong murder ang kasong ilahang giandam nga ipasaka sa wala una niining gihinganlang mga suspek. Apan kampanti si P/Supt. Sermese nga maduso na nila ang kaso ngadto sa Korte batok sa mga suspek tungod sa mga bug-at nga mga ebedensiya nga ilahang gigunitan sa pagkakaron.
Aminado ang maong opisyal nga naglisod sila sa pag istablisar sa motibo sa pagpatay kang P03 Bachoco tungod sa daghang mga anggulo ang milutaw sa pagkakaron.
Apan usa lamang ang gikonsidera karon sa kapulisan nga motibo sa pagpatay kang P03 Bachoco ang may kalabutan sa iyahang trabaho isip Chief Intelligence operatives sa Tambler Police Station human nga daghan kining napasikop nga mga personalidad nga lambigit sa iligal Nga droga og krimenalidad sa Gensan.
