General Santos City—Padayon karon ang gihimong imbistigasyon sa Police Station 4 kalabutan sa pagpamusil patay sa managsuong silang si Anecito Iran Anog ug Jerwin Iran Anog, Pulos Hingkod ang pang-idaron ug residenti sa Promise Land, phase 1, Barangay Mabuhay ning syudad kansa gipusil patay 800 metros ang gilay-on gikan sa Police Station 4.
Sumala ni Police Sr. Inspector Ananias Vasquez, hepe sa Police Station 4 nga bag-uhay lang nakagawas sa ilang silda ang duha ka mga biktima human nga napriso dihang ilang nadakpan atol sa ilang gihimong search operation niadtong Marso 29, sa Barangay Mabuhay.
Gikaingong nakapyansa ang duruha ug tig 250,000.00 matag usa kanila maong nakagawas sa prisohan. Nasayran nga pauli na unta ang duruha sakay sa tricycle dihang sila gipamusil sa duha ka suspek nga sakay sa motorsiklo. Paspas sab nga misibat ang mga suspek human sa pagpamusil.
Gibutyag ni PSI Vasquez nga pila na kahigayon nga napriso ang managsuon gumikan sa iligal nga droga. apan pila sab kahigayon nga nakagawas sa prisohan human nga nakapyansa.
Giangkon sab ni PSI Vasquez nga apil gyud sa ilang drug watchlist ang mga biktima ug notado na usab silang tigpayuhot ug droga.
