Kumalarang, Zamboanga del Sur – Patay ang usa ka 62 anyos nga mag-uuma human kining gitigbas sa iyang silingan alas 2:00 kagahapon sa hapon didtong dapita sa Brgy. Salagmanok, Kumalarang, Zamboanga Del Sur .
Wala nay kinabuhi nga na-abtan sa tropa sa Kumalarang PNP ang biktima nga nailang si Odie Maligaya, residente sa Brgy Tininghalang, Lapuyan, ning probinsya.
Didto nakit-an ang patay nga lawas sa biktima sa balay sa suspek nga nailang si Olimpio Malimbol, 60 anyos, lumulupyo sa Purok Uno, Brgy Salagmanok, Kumalarang.
Sa inisyal nga imbestigasyon nasayran nga naabtan sa suspek ang biktima nga natulog sulod sa iyang kaugalingon nga pinuy-anan, gumikan sa kapungot ang suspek nga tag-iya sa balay nikuha sa iyang lampas og didto na gitigbas ang biktima sa lain-liang parte sa lawas og ulo niini.
Dako ang pagduda sa suspetsado nga ang biktima maoy nikawat sa iyang lubi.
Ang patay nga lawas kasamtangan nga gipa-ilalom sa post mortem examination samtang ang suspek gibalhog na sa buhatan sa kapulisan sa Kumalarang.
