Nagpabor ang mga konsumidor sa hagna nga nagatuyo nga dulaon ang expiry date sang mga gift check, gift card kag gift certificate.
Ini bangud nakalusot na sa ikatlo kag katapusan nga pagbasa sa kamara ang house bill number 6016 ukon ang “Gift Check Non-expiry Act”.
Pabor man ang grupo nga “laban konsyumer” sa paghulag sang hagna bangud maayo ini nga tikang agud proteksyunan ang mga cosumers.
Ginpaathag sang presidente sang laban konsyumer nga si Vic Dimagiba nga bayad na ang mga gift certificate kabangdanan dapat nga magamit ini sang mga konsumidor san-o man nila nga luyag gamiton.
Panawagan naman ni Steven Cua, presidente sang Philippine Amalgamated Supermarkets Association, gamiton gilayon ang mga gift certificate agud mag-tiyog man ang kuwarta sa ila nga may mga negosyo.
Nasaad man sa hagna nga dapat siguruhon sang mga may gift certificate nga indi ukot ukon gisi ang papel sini bangud puwede nga indi pagbatunon sang mga tiendahan.
Indi sakop sang hagna ang mga gift card nga nagikan sa mga promo kag contest.
