Giilang alyas Cafgu, nadakpan sa drug buy-bust operation sa Talakag, Bukidnon

Gitangkagul na sa prisuhan ang giilang alyas “Cafgu” human nga nadakpan sa gilusad nga drug buy-bust operation sa mga personahe sa Talakag Municipal Police Station pasado alas 2:30 sa kadlawon kagahapon.

Ang suspek naila sa tinuod nga pangalan nga si Miguel Carlo Deveza, alyas Cafgu, 33 anyos, ulitawo , ug residente sa maong lungsod.

Narekober ug nakompiska gikan kang alyas Cafgu ang upat ka mga pakete sa gituohang drogang shabu, P500 bill nga buy-bust money, kwartang mubalor sa P7000 sa nagkadaiyang denominasyon, usa ka unit sa Samsung nga cellphone, ug mga drug paraphernalia.

Mutimbang sa 0.36 gramos ang mga nakompiskang droga nga gibana-bana nga mukantidad og P2,465.00.

Sa karon, gikustodiya sa Talakag Municipal Police Station ang suspek samtang giturn-over sa Regional Forensic Unit 10, sa Camp Evangelista, Patag, Cagayan De Oro City ang mga nakompiskang ebidensya alang sa eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang dinakpang suspetsado.