Giingong suspect sa carnapping, gipusil-patay sulod sa boarding house

Davao City – Nanawagan ang kapulisan sa Tagum City Police Station sa katawhan nga kung kinsa katong adunay impormasyon nga makatudlo sa suspect nga mipusil-patay sa usa ka batan-on sa Purok Vipatil, Barangay Magugpo West, Tagum City , gilayong mu-report sa ilang buhatan.

Sa impormasyong gipadala sa DXDC RMN Davao gikan kang Police Lieutenant Colonel Jeffrey Latayada, ang Chief of Police sa Tagum City PNP, giila lamang ang biktima nga si Alias “NIKO”, 18 anyos ug residente sa Purok Gemelina Barangay KingKing, Pantukan, Davao De Oro.

Sa pakighinabi usab sa DXDC kang PLt. Joe Marlon Cabe, Chief Investigator sa Tagum City PNP, naabtan nalang nila nga naligo sa kaugalingong dugo ug wala nay kinabuhi ang batan-on niadtong April 17, 2024 sa gabii sulod sa iyang boarding house.

“According sa among napangutan-an, naghigda-higda ra ni, natulog raning victim sulod sa iyang boarding house. Naay tawo nga kalit nisulod nya gipusil ang victim, several times. Patay diretso ang victim. Allegedly, suspect ni siya sa mga nawalaan og motor diria. Naa man gud ni sila grupo nga maoy ginasilip namo karon,” saysay pa ni Cabe.

Sa pagkakaron, padayon pa ang imbestigasyon sa kapulisan kalabot sa krimen. Apan usa sa ilang gipanubayan nga anggulo mao ang giingong pagkalambigit niini sa carnapping sa Tagum City ingon man sa probinsya sa Davao de Oro.

RadyoMaN Ivy Parido