Giingong van nga mandagit og tawo, wala natala sa Tagum City PNP

Davao City – Mipasibaw sa iyang gibati si Jeson Lauron, ang igsuon ni Jhon Lauron kinsa napalgan na lamang nga wala nay kinabuhi sa Davao de Oro nga unta makab-ot na nila ang hinanaling hustisya.

Sa interview sa DXDC RMN Davao kang Jeson, emosyonal kining nanawagan sa kapulisan sa Tagum City nga imbestigahan ang van nga giingong maoy nagdagit sa iyang manghud ug igo lang gihulog sa laing lugar nga patay na.

“Kanang van, wala mi kabalo kung asa na gikan ug kung unsay kalambigitan ana diria sa Tagum. Nganong manguha na sila og tao? Nganong mupatay na silag tao? Ug nganong panguhaon nila ang mga gamit? Gusto unta mi mangayo’g hustisya. Kanang van nga sige’g tuyok-tuyok aning Tagum, madakop na unta na sila, makita na unta na sila aron among pamilya ug tawong apektado, mahapsay na ang hunahuna. Makuha na namo ang gipangayong hustisya,” segun ni Lauron.

Kini nga insidente giklaro sab sa sibyahan ngadto sa Tagum City PNP ug mitubag si PLTCOL Jeffrey Latayada wala kini natala sa ilang buhatan apan andam matud pa silang muimbestiga kung ugaling ma-monitor nila kini.

RadyoMan Ivy Parido